BAUCAU — Diretor-Jerál Tékniku Sientífiku Institutu Nasionál Saúde Públika Timor-Leste (INSPTL), Sr. Gregório Rangel, ofisialmente halo abertura ba formasaun kona-ba Jestaun no Lideransa ba jestór saúde sira iha Munisípiu Baucau, Segunda-feira (27/07/2026).

Iha abertura ne'e, Diretor-Jerál INSPTL, Sr. Gregório Rangel, subliña katak koñesimentu kona-ba lideransa nian sai xave importante tebes atu foti desizaun ne’ebé lalais, loos, no efisiente, hodi nune'e bele hasae kualidade servisu saúde nian ba komunidade. Nia mós husu ba jestór saúde sira atu partisipa ativa iha formasaun ne’e hodi hetan kuinesementu husi formadores sira no importante liu maka aplika fali kuinesimentu sira ne’ebé hetan ona hodi jere rekursu sira ne’ebé iha ho didíak iha partisiooante sira nia servisu fatin.

Objetivu Jerál husi formasaun ne’e maka atu melhora no hametin kapasidade lideransa no jestaun husi profisionál saúde iha Munisípiu Baucau atu bele aumenta qualidade servisu saúde, fortalece koordinasaun ekipa, no suporta implementasaun programa saúde ne'ebé efetivu no sustentável, nomos ho objetivu Espesífiku maka hanesan tuir mai :

1. Hasa'e koñesimentu no abilidade lideransa husi profisionál saúde atu bele foti desizaun ne'ebé efetivu ho responsável.

2. Hametin kapasidade planeamentu, organizasaun, implementasaun, monitorizasaun no avaliasaun programa saúde iha nível servisu.

3. Hasa'e abilidade komunikasaun, koordenasaun no kolaborasaun entre membru ekipa saúde no parseiru sira.

4. Hasa'e kapasidade jere rekursu umanu, finanseiru no lojístiku atu garante utilizasaun rekursu ne'ebé efisiente.

5. Hasa'e kultura responsabilizasaun (accountability), transparénsia no ética profissional iha prestasaun servisu saúde.

6. Hametin kapasidade atu rezolve problema no jere konflitu iha fatin servisu liuhusi abordajen lideransa adaptativa.

7. Hasa'e motivasaun no kompromisu profisionál saúde atu fornece servisu saúde ne'ebé sentradu ba komunidade no melhora rezultadu saúde iha Munisípiu Baucau.

Partisipante ka formandus sira hamutuk nain 25 ho klasifikasaun hanesan Diretor Saúde Munisipál Baucau, xefe departamentu HoREX, xefe Programatiku, sentru saúde sira, responsabilidade programa sentru saude no Postu saude nian iha munisípiu laran tomak. Formasaun ne’ebé hala’o daudaun ne'e sei lori loron lima (5), hahú husi loron 27 to'o 31 Jullu 2026. Atividade ne'e realiza loloos ho apoiu finanseiru ne'ebé mai husi Orsamentu Jerál Estadu (OGE) tinan 2026 nian liusi INSPTL, no fasilita husi formadores sira ne'ebé mai husi INSPTL hamutuk ho parseria husi organizasaun Maluk Timor