DILI, kuarta-feira, 15/07/2026, Presidente Institutu Nasionál Saúde Públika Timor-Leste (INSP-TL), Dr. Névio da C. Sarmento, lidera enkontru koordenasaun importante ida ho parseriu hosi Menzies School of Health Research. Enkontru ne'e hala'o iha sala reuniaun INSP-TL.

Objetivu prinsipál hosi enkontru ne'e mak atu haforsa liután koperasaun bilaterál. Alende ne'e, parte rua diskute mós progressu hosi programa koperasaun saúde nasionál sira. Koordenasaun ne'e foku mós ba dezenvolvimentu kapasidade laboratoriu no peskiza sientífika iha Timor-Leste. Sorumutu ne'e nudar kontinuasaun ba serbisu parseria estratéjiku hodi hametin koperasaun tékniku, liuliu iha dezenvolvimentu kapasidade profisionál saúde, peskiza sientífika, no fortalesimentu sistema laboratóriu nasionál.

Enkontru ida-ne'e hetan partisipasaun másimu hosi Diretor Jerál Tekniku Sientifiku (DGTC-sigla Portugues), Diretor Jerál Laboratoriu Saúde (DGLS-sigla Portugues). Marka mós prezensa Diretores Nasionais hanesan Diresaun Nasional Peskiza e Desenvolvimentu, Diresaun Nasional Saude Publika, Unidade Etika Peskiza e Desenvolvimentu, Unidade Jestaun Parseria, hamutuk ho staff tekniku sira hosi instituisaun ne'e.

Iha enkontru ne'e, Presidente Dr. Névio da C. Sarmento hato'o agradesimentu ba Menzies. Menzies fó ona apoiu boot ba dezenvolvimentu setór saúde públika iha rai laran. Presidente INSP-TL mos foku ba planu servisu hamutuk ho Menzies atu suporta INSP-TL hodi sai instituto peskiza saude publika nebe forte liu tan ia futuru mai.

Hafoin rona intervensaun sira ne’e representante parseriu Menzies School of Health Research mós hateten katak sira prontu nafatin atu kontribui ba INSP-TL tuir planu sira nebe estipula ona iha Akordu Kooperasaun tekniku nia laran no prontu desenvolve planu asaun konjunta ida nebe integradu no komprehensivu hamutuk ho INSP-TL tuir prioridade INSP-TL nian.

Reuniaun ne'e termina ho susesu no parte rua konkorda atu hamutuk implementa planu parseriu ba oin.