INSP-TL, 22 Jullu 2026. Diretór Geral Tékniku no Sientífiku, Instituto Nacional Saúde Públiku Timor-Leste (INSP-TL), Gregorio Rangel, realiza enkontru avaliasaun semestre dahuluk ho Diresaun Nasional Formasaun (DNF) iha Auditóriu INSP-TL.

Iha sesaun abertura, Diretór Geral Tékniku no Sientífiku, Gregorio Rangel, hato'o liafuan bem-vinda ba Diretór DNF, Sr. Amelito Gomes, formador sira no funsionáriu tékniku hotu ne'ebé marka prezensa iha enkontru ne'e. Nia enfatiza importánsia husi dezenvolvimentu kapasidade rekursu umanu iha setor saúde atu hasa'e kualidade servisu saúde públika no apoiu implementasaun prioridade estratéjika INSP-TL.

Durante enkontru, Diretór DNF hamutuk ho ekipa formador no staff tékniku aprezenta rezultadu implementasaun atividade durante semestre dahuluk tinan 2026. To'o agora, DNF realiza ona atividade formasaun ba profisionál saúde hamutuk 942, kompostu husi 619 feto no 323 mane, iha área prioridade oioin atu fortalece kapasidade rekursu umanu iha sistema saúde nasional. Aleinde ne'e, DNF mos aprezenta progresu dezenvolvimentu Estratéjia Nasional Formasaun, módulos formasaun iha área lideransa no jestaun, saúde públika, inklui preparasaun Standard Operating Procedures (SOPs), diretrizes relatóriu, no dokumentu tékniku sira seluk atu apoia implementasaun programa formasaun.

Iha oportunidade ne'e, Diretór Geral Tékniku no Sientífiku orienta DNF atu kontinua hametin koordenasaun ho Diresaun Nasional Peskiza no Dezenvolvimentu (DNPD) no Diresaun Nasional Saúde Públika (DNSP) hodi prepara no organiza Semináriu Nasional no Internasional 2026, ne'ebé sei realiza iha fulan Novembru 2026 atu komemora aniversáriu Instituto Nacional Saúde Públiku Timor-Leste (INSP-TL). Semináriu ne'e sei sai hanesan plataforma importante atu fahe rezultadu investigasaun sientífika, promove kooperasaun entre investigadores, akademia no parseiru dezenvolvimentu, no fortalece kultura investigasaun no inovasaun iha Timor-Leste.

Iha remata enkontru, parte rua konkorda atu realiza enkontru koordinasaun tuir mai iha fulan Setembru 2026 hodi monitoriza progresu implementasaun atividade sira, avalia preparasaun ba semináriu nasional no internasional, no diskute prioridade estratéjika ba trimestre ikus tinan 2026. Enkontru ne'e partisipa husi Diretór Geral Tékniku no Sientífiku, Diretór Diresaun Nasional Formasaun, formador sira no funsionáriu tékniku husi DNF, ne'ebé hotu reafirma sira-nia kompromisu atu kontinua hasa'e kualidade formasaun no dezenvolve rekursu umanu saúde ne'ebé kompetente atu responde ba nesesidade saúde públika iha Timor-Leste