VIQUEQUE, 22 Jullu 2026___Ministériu Saúde (MS) Timor-Leste Komemora Loron Nasional Saúde ba Da-11 iha Munisipiu Viqueque. Tema ba Komemorasaun loron nasional saúde iha Munisipiu Viqueque mak “Hau nia Tasi, Hau nia Timor ba Hau nia Saúde”.

Entretantu, tuir ajenda ba programa refere loron 21 Jullu 2026, horas 07:00 hahu uluk Marsa Saudável iha ambitu loron nasional saúde hosi Sentru Saúde Munisipiu Viqueque to’o iha kampu Demokrasia Boramatan Viqueque Villa, 09:00 Ezersísiu Jínastika, Jogu amijade no asaun karitativa ba komunidade ne’ebé sofre TB, Malnutrisaun no pasiente iha internamentu.

Loron 22 Jullu 2026, Selebrasaun Misa asaun da Graça iha paroku Nossa Senhora da Conceição Viqueque ne’ebé prezide hosi Rev.Pe. Tomas de Aquino da Cruz.

Iha Deskursu Vise-Ministru ba Fortalesimentu Institusional Saúde (VMFIS), Sr. José dos Reis Magno, Lic.SP, MM. hateten, loron ohin hanesan loron ida ne’ebé maka importante ba tempu ita atu reflete, tempu atu fó rekonesementu importante liu maka tempu atu renova ita nia kompremisiu atu servi no servisu ba saúde ba povu Timor-Leste. Ita selebra ba loron ida ne’e ba ema sira ne’ebé didika sira nia moris tomak atu asegura ema nia saúde no salva ema seluk nia moris. Ita selebre rezultadu ne’ebé maka sistema Nasional konsege ona no reafirma ita nia hakarak atu kontinua hari sistema saúde ida ne’ebé forte liutan, modernu liutan no Justu liutan ba besik liu iha komunidade.

Iha deskursu VMFIS, mós hato’o kona-ba tema ba komemorasaun loron nasional saude iha Munisipiu Viqueque maka “Hau nia Tasi, Hau nia Timor ba Hau nia Saúde”

Signifikadu iha tema ne’e maka, tasi mak pontu moris nia, tasi mak fó aihan , tasi maka sustenta ekonomia ba familia sira tasi mak parte ida mosu identidade nasional tasi mós importante ba ita nia saúde, wainhira ita proteze tasi ita proteze aihan ne’ebé maka ita konsume, wainira ita proeze bee matan mota no ambiente ita prevene moras barak no garantia moris diak ba jerasaun tuir mai.

Entretantu iha komemorasaun ne’e hala’o mós lansamentu livru STG no Digitalizasaun, distribui sertifikadu Exemplar, premiu ba manan na’in desportiva, entrega kareta Multi funsaun ba PAM Munispiu Viqueque nomos dada rifa ba Munisipiu ne’ebé reponsavel ba Loron Nasional Saúde tinan 2027.

Marka prezensa iha komemorasaun ne’e maka;

- Vise-Ministru ba Fortalesimentu Institusional Saúde (VMFIS)

- Presidente autoridade Munisipiu Viqueque

- Amu Paroku Nossa Senhora da Conceição Viqueque

- Reprezentante OMS iha Timor-Leste

- Komandante PNTL Munispiu Viqueque

- Parseiru Dezenvolvimentu

- Sefe sukus, estudantes no komunidades Munispiu Viqueque