INSP-TL, 21 Jullu 2026 – Diretór Geral Tékniku no Sientífiku, Instituto Nacional Saúde Públiku Timor-Leste (INSP-TL), Gregorio Rangel, M.Sc, realiza enkontru avaliasaun semestre dahuluk ho Diresaun Nasional Peskiza no Dezenvolvimentu (DNPD) iha sala enkontru Diresaun Geral Tékniku no Sientífiku.

Iha sesaun abertura, Diretór Geral Tékniku no Sientífiku, Gregorio Rangel, M.Sc, hato'o liafuan bem-vinda ba Diretór DNPD, dr. Cláudio de Jesus Oliveira, peskizador sénior, peskizador júnior no funsionáriu tékniku hotu ne'ebé marka prezensa iha enkontru refere.

Durante enkontru, Diretór DNPD hamutuk ho ekipa peskizador no staff tékniku aprezenta rezultadu implementasaun atividade durante semestre dahuluk tinan 2026. To'o agora, DNPD planeia hala'o investigasaun sientífika hamutuk haat, ne'ebé inklui: Jestaun fornesimentu no stock iha área saúde (Supply and Stock Management in Health); kualidade bee hemu (potável); saúde mentál no nutrisaun; no kankru.

Husi projetu investigasaun haat ne'e, rua ezekuta ona, no rua seluk sei iha hela prosesu aprovasaun étika no administrativu molok tama ba faze implementasaun.

Iha oportunidade ne'e mos, DNPD simu oreintasaun husi DGTC hodi organiza Semináriu Nasional no Internasional iha tinan 2026 atu komemora aniversáriu Instituto Nacional Saúde Públiku Timor-Leste (INSP-TL), ne'ebé sei realiza iha fulan Novembru 2026. Semináriu ne'e espera bele sai hanesan plataforma atu fahe rezultadu investigasaun sientífika, promove kolaborasaun entre peskizador sira no parseiru dezenvolvimentu, no haforsa kultura investigasaun iha Timor-Leste.

Iha remata enkontru, parte rua konkorda atu realiza enkontru tuir mai iha fulan Setembru 2026 hodi halo monitorizasaun ba progresu implementasaun atividade sira, avalia preparasaun ba semináriu nasional no internasional, no diskute planu prioridade sira antes tama ba trimestre ikus tinan 2026. Enkontru ne'e partisipa husi Diretór Geral Tékniku no Sientífiku, Diretór Diresaun Nasional Peskiza no Dezenvolvimentu, peskizador sénior, peskizador júnior, no funsionáriu tékniku husi DNPD.