INSP-TL, 18 Juñu 2026. Instituto Nacional de Saúde Pública de Timor-Leste (INSP-TL) realiza enkontru koordenasaun ho Programa Kuidadu Palliativu Ministériu da Saúde atu prepara realizasaun formasaun ba dala neen (6) kona-ba kuidadu palliativu. Enkontru ne’e realiza iha Sala Enkontru Diretores-Gerais INSP-TL.

Iha abertura enkontru, Diretor-Geral Tékniku no Sientífiku INSP-TL, Gregorio Rangel, M.Sc., hato’o liafuan boas-vindas ba ekipa husi Programa Kuidadu Palliativu Ministériu da Saúde no hatudu apresiasaun ba servisu hamutuk ne’ebé kontinua halo atu reforsa kapasidade profisionál saúde sira iha área kuidadu palliativu.

Iha oportunidade ne’ebé hanesan, dr. Lucio F. Babo Soares hato’o agradese ba INSP-TL tanba simu di’ak ekipa Programa Kuidadu Palliativu atu halo diskusaun kona-ba preparasaun workshop kuidadu palliativu ba dala neen, ne’ebé planeia atu realiza iha INSP-TL husi loron 27 to’o 31 Jullu 2026.

Durante enkontru, Diretor Nasional Formasaun INSP-TL, Sr. Amelito Gomes, S.Kep., Ners., enfatiza katak koordenasaun entre instituisaun relevante sira importante tebes atu garante implementasaun formasaun tuir dispozisaun Dekretu-Lei ne’ebé atribui responsabilidade ba INSP-TL atu organiza no koordena atividade formasaun sira iha setor saúde.

Responsável Programa Kuidadu Palliativu Ministériu da Saúde, Sr. Eugénio Soares, esplika katak kuidadu palliativu bazeia ba pilar importante haat, mak hanesan: prestasaun kuidadu palliativu, dezenvolvimentu politika, disponibilidade ekipamentu no materyál médiku, no promosaun peskiza atu sustenta melhoria servisu sira.

Iha sorin seluk, Diretor Nasional Peskiza no Dezenvolvimentu INSP-TL, dr. Cláudio de Jesus Oliveira, salienta katak peskiza iha papel estratéjiku atu produz evidénsia sientífika ne’ebé bele utiliza husi decisores polítiku sira hanesan baze ba formula politika no tomada desizaun iha futuru.

Enkontru ne’e remata ho aseitasaun husi parte rua katak formasaun kuidadu palliativu ba dala neen sei realiza iha INSP-TL husi loron 27 to’o 31 Jullu 2026. Parte rua mós konkorda atu kontinua halo koordenasaun kona-ba aspetu tékniku sira seluk antes realizasaun atividade refere. Formasaun ida ne’e sei hetan fasilitasaun husi Asia Pacific Hospice Palliative Care Network (APHN).

Enkontru ne’e hetan partisipasaun husi Diretor-Geral Tékniku no Sientífiku, Diretor Nasional Formasaun, Diretor Nasional Peskiza no Dezenvolvimentu INSP-TL, no mós responsável Programa Kuidadu Palliativu husi Ministériu da Saúde.