INSP-TL, 16 Outubru 2026 — Institutu Nasionál Saúde Públika Timor-Leste (INSP-TL), liuhosi Unidade Jestaun no Parseria (UJP), hala’o diskusaun téknika ho ekipa Maluk Timor kona-ba esbosu Standard Operating Procedures (SOP) for Technical Partnerships, iha Salaun Primaveira, INSP-TL, Comoro.

Diskusaun ne’e lidera hosi Sr. Ivo Ireneu da C. Freitas, Diretór UJP, no envolve Diretór Garantia Kualidade (UGQ), ekipa téknika UJP no UGQ, no Tékniku Jurídiku hosi Unidade Apoiu Jurídiku (UAJ), atu fó kontribuisaun téknika, garantia kualidade no jurídika ba hadi’a esbosu SOP ne’e.

SOP ne’e destina atu sai orientasaun padronizada ba jestaun parceria téknika entre INSP-TL ho ajénsia, organizasaun no instituisaun nasionál no internasionál hotu, inklui parseiru dezenvolvimentu, ONG, ajénsia bilaterál no multilaterál, ajénsia Nasoins Unidas no instituisaun públika relevante sira.

Diskusaun foka ba prosedimentu identifikasaun no rejistu parseiru, koordenasaun entre direksaun no unidade sira, preparasaun no revizaun akordu, aprovasaun, asinatura, implementasaun, monitorizasaun no avaliasaun parceria, atu asegura prosesu ne’ebé klaru, transparente no responsabilizável.

Husi perspetiva téknika, garantia kualidade no jurídika, harmonizasaun SOP ne’e importante atu asegura konformidade ho kuadru jurídiku no mandatu institusionál INSP-TL, no mós alinhamentu ho prioridade saúde públika no planu estratéjiku aplikável. Liu hosi prosesu ida-ne’e, INSP-TL buka hametin sistema jestaun parceria ne’ebé koordenadu, padronizadu no orientadu ba rezultadu, hodi promove kooperasaun efetiva ho ajénsia no instituisaun nasionál no internasionál sira ba dezenvolvimentu saúde públika iha Timor-Leste.