INSP-TL, 14 Outubru 2026___Institutu Nasional Saúde Públika Timor-Leste (INSP-TL) liu hosi Unidade Jestaun i Parseria (UJP) ne’ebé lidera hosi Sr. Ivo Ireneu da C. Freitas, hala’o enkontru ho Parseiru Dezenvolvimentu Dili Medical Center (DMC) hodi aprezenta ba esbosu Akordu Kooperasaun Tékniku (AKT) entre INSP-TL ho DMC. Iha salaun Primaveira, INSP-TL Comoro.

Objetivu iha enkontru ne’e, atu aprezenta analiza no diskute kontéudu esbosu akordu, inklui aspetu tékniku no jurídiku, responsabilidade no obrigasaun hosi parte rua, no prosedimentu implementasaun atividade kooperasaun, antes kontinua ba prosesu finalizasaun no aprovasaun akordu tuir prosedimentu ne’ebé aplika.

Diskusaun ne’e mós fó oportunidade ba parte rua atu troka hanoin no klarifika matéria sira ne’ebé presiza ajustamentu, hodi asegura katak akordu ne’e define knaar no responsabilidade hosi parte rua ho klaru no suporta implementasaun kooperasaun tuir kompeténsia institusionál no dispozisaun legál ne’ebé aplika.

Atividade ne’e partisipa hosi Diretór UJP no ekipa, reprezentante DMC, tékniku jurídiku hosi Unidade Apoiu Jurídiku (UAJ), tékniku sira hosi Diresaun Jeral Laboratóriu Saúde no reprezentante hosi Gabinete Prezidente INSP-TL. Partisipasaun hosi unidade no ekipa relevante sira ne’e importante atu asegura katak esbosu akordu konsidera nesesidade téknika, jurídika no operasionál, hodi sai baze ba kooperasaun ne’ebé klaru, efetivu no sustentável entre INSP-TL no DMC.