Viqueque/Ossu, 07 Outubru 2026. Instituto Nacional da Saúde Pública de Timor-Leste (INSP-TL), Diresaun Geral Tekniku Sientífiku, liu husi Diresaun Nasional Saúde Públika (DNSP), realiza monitorizasaun no reforsa investigasaun ba kazu raiva ne’ebé akontese iha Munisípiu Viqueque, Postu Administrativu Ossu, Suku Wabubu, Aldeia Buanurak.

Ekipa INSP-TL, lideradu husi Diretor Geral Tekniku Sientífiku, Gregorio Rangel, M.Sc., hamutuk ho ekipa DNSP, realiza monitorizasaun no reforsa investigasaun ba kazu raiva ne’ebé akontese iha loron 06 Outubru 2026, iha Aldeia Buanurak, Suku Wabubu, Postu Administrativu Ossu, Munisípiu Viqueque. Iha prezensa ekipa INSP-TL, hala’o monitorizasaun no reforsa investigasaun ba kazu raiva ne’ebé akontese ona, liu husi organizasaun dadus, elaborasaun relatóriu no arkivamentu dadus ho diak. Além husi ne’e, ekipa mos halo akompanhamentu ba jestaun dadus dengue, infesaun respiratóriu no kazu sira seluk ne’ebé rejista iha Sentru Saúde Komunitária Osso.

Kazu ema ne’ebé hetan tata husi asu ne’ebé rejista iha Postu Administrativu Ossu, husi fulan Janeiru to’o loron 06 Outubru 2026, hamutuk 27 kazu. Husi total kazu 27 ne’e, 3 kazu mak positivu raiva iha asu. Ema sira ne’ebé hetan tata husi asu sira ne’e, hotu-hotu hetan ona vasina raiva husi pesoál saúde sira iha Sentru Saúde Komunitária Ossu. Partisipa iha monitoring ne mak hanesan Direitor Geral Tekniku Sientifiku INSP-TL, Gregorio Rangel, Xefe Sentru Saude Ossu, official Vigilansia iha SSK Ossu no HP Buanurak, official sira DNSP nian mak hanesan Albino Albuquerque, Marito Soares, Faviola D. Nunes.